Cümə günü 14 Dekabr 2018

Təhsil

ADAU-da media təmsilçilərinin infoturu keçirilib

Kamilə Seyidli - 09/07/2018

Kənd Təsərrüfatı Nazirliyinin yeni media strategiyası, eləcə də nazirlik tabeliyindəki qurumların fəaliyyəti, struktur dəyişikliyi və kənd təsərrüfatının vəziyyəti ilə əyani tanış olmaq məqsədi ilə Kənd Təsərrüfatı Nazirliyinin İctimaiyyətlə Əlaqələr Şöbəsi infotur keçirir.

2018-ci ilin 06-08 iyul tarixlərində Bakı-Şəki-Qax-Gəncə-Göygöl-Ucar-Bakı istiqamətində reallaşan tur zamanı ölkənin müxtəliv kütləvi informasiya vasitələrini təmsil edən 25 nəfərdən ibarət jurnalist heyəti Azərbaycan Dövlət Aqrar Universitetində (ADAU) olublar. Universitetin maddi-texniki bazası, o cümlədən tələbə evləri, müasir heyvandarlıq kompleksi, maşın-traktor parkı, istixanaları, quşçuluq tədris mərkəzi, baytarlıq və bitki klinikaları, kitabxana, təlim mərkəzləri, torpaqşünaslıq və aqrokimya laboratoriyası və digər yerlərlə tanış olan media təmsilçiləri yaradılmış şəraiti çox yüksək qiymətləndiriblər.

Tanışlıqdan sonra keçirilən görüşdə çıxış edən universitetin rektoru, AMEA-nın müxbir üzvü, professor İbrahim Cəfərov bütün media nümayəndələrinə, habelə görüşün təşkilində göstərdiyi dəstəyə görə Kənd Təsərrüfatı Nazirliyinin İctimaiyyətlə Əlaqələr Şöbəsinin müdiri Anar Hüseynova təşəkkürünü bildirməklə, aqrar təhsilə dövlət dəstəyi, aqrar mütəxəssislərə ehtiyacın ödənilmə səviyyəsində ADAU-nun rolu, aparıcı müəssisələrlə əməkdaşlıq əlaqələri, təhsil proqramlarının yenilənməsi istiqamətində həyata keçirilən tədbirlərdən danışıb. Görülmüş işlərin təbliğində medianın əhəmiyyətini qeyd edən rektor bu kimi turların universitet-media əlaqələrinin genişləndirilməsinə, aqrar təhsilin inkişafına mühüm töhfələr verdiyini qeyd edib.

Tədbirdə Kənd Təsərrüfatı Nazirliyinin İctimaiyyətlə Əlaqələr Şöbəsinin müdiri Anar Hüseynov, Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə Edilməsi üzrə Dövlət Xidmətinin İctimaiyyətlə Əlaqələr üzrə mütəxəssisi Afət Yaqubova, “ARB 24” telekanalının baş direktoru Nadir Şəfiyev aqrar sahədə və aqrar təhsildə baş verən struktur dəyişiklikləri, onların ictimaiyyətə çatdırılmasının forma və üsulları barədə çıxışlar edib, sualları cavablandırıblar.

Hadisə

Təhsil