Çərşənbə günü 22 Noyabr 2017

Siyasət

Gəncədə 'Elektron hökumət'in təkmilləşdirilməsi ilə bağlı təlim keçirilir

Samirə Səmədova - 03/11/2017

“Regionlarda Davamlı İnkişaf üçün "Elektron hökumət" və "Elektron iştirak" İmkanlarının Təkmilləşdirilməsi" təlimi BMT-nin İnkişaf Proqramının Azərbaycan nümayəndəliyi, Heydər Əliyev Fondunun “Regional İnkişaf” İctimai Birliyinin və Nəqliyyat, Rabitə və Yüksək Texnologiyalar Nazirliyinin birgə reallaşdırdığı “Azərbaycan Respublikasında İKT infrastrukturunun və İKT xidmətlərinin davamlılığının və səmərəliliyinin modernləşdirilməsi” layihəsi çərçivəsində keçirilir.

Bu layihə çərçivəsində gələcəkdə Qəbələ, Lənkəran, Bərdə, Şirvan, Quba və digər regionlarda da keçirilməsi nəzərdə tutulan təlimlərin əsas məqsədi innovativ texnologiyaların tətbiqi ilə biznesin inkişaf yollarını araşdırmaq, bununla bağlı yerli mütəxəssislərlə beynəlxalq ekspertlər arasında təcrübə mübadiləsi yaratmaq, habelə, daha səmərəli, effektli regional iqtisadi inkişafa və mədəni irəliləyişə dəstək olmaq.

Yerli və xarici ekspertlərin iştirakı ilə təşkil olunan təlimdə elektronlaşmaya vətəndaşların cəlb olunmasını tənzimləməkdə məsuliyyətli olan müvafiq dövlət orqanlarının rəsmiləri və sahibkarlar iştirak edir.

Təlimdə "Elektron hökumət" və "Elektron iştirak" konsepsiyalarının qlobal inkişaf tendensiyaları; dövlətin şəffaf idarə edilməsində İKT-dən daha səmərəli istifadə; internet təhlükəsizliyi, məxfilik, internetə çıxış, inkişaf və s. məsələlər müzakirə ediləcək. "Elektron hökumət" və "Elektron iştirak" infrastrukturu, “Elektron hökumət” portalı (e-gov.az), portalın vətəndaşlara təqdim etdiyi xidmətlər, portaldan istifadə qaydaları, elektron imza, elektron sənəd haqqında nəzəri və praktik biliklər aşılanacaq.

Gün ərzində davam edəcək təlimin iştirakçılarına real iş rejimində "Elektron hökumət" portalı (e-gov.az) üzrə praktik bacarıqlarını artırmaq, habelə, elektron imza və elektron sənəd haqqında məlumat almaq imkanı veriləcək.

Təlimdə regionlarda dövlət qulluqçularının İKT potensialının gücləndirilməsi ilə bağlı beynəlxalq təcrübənin tətbiqi, vətəndaşların dövlət xidmətlərinə çıxış imkanı məsələlərinə də toxunulacaq.

Təlim çərçivəsində "Elektron Azərbaycan" maarifləndirici toplusunun təqdimatı keçiriləcək. Məlumat üçün bildirək ki, kitabçada "Elektron hökumət" infrastrukturu və onun əsas komponentləri, "Elektron hökumət" portalı, portalda mövcud olan xidmət qrupları, elektron imza və onun tətbiq sahələrindən bəhs edilir.

Təlimin sonunda iştirakçılara BMT-nin İnkişaf Proqramının Azərbaycan nümayəndəliyi tərəfindən sertifikat təqdim ediləcək.

apa.az

 

 
 
 

Hadisə